Kerstin Johansson oon monina vuosina ilahtannu lukioita Tornionlaaksossa pakinoila meänkielelä paikalisavisissa niin ruottin ko suomen Tornionlaaksossa. Nyt se oon yhistänny likemäksi 110 näistä pakinoista kahtheen kirhjaan. Se oon ilahtavvaa lukemista rikhaala ja elävällä meänkielelä. Pakinoila, jokka oon lyhykäiset ja konsentreeratut, oon suuri laajuus. Se oon helppo tuntea itteänsä niissä eri tilantheissa. Kirjat pitäsit sopia villin hyvin niinku äähneenlukukirjoina niin institysuunissa ko vanhuusasunoissa Tornionlaaksossa. Kerstin Johansson viekottellee monhiin nauhruin.

Kipinä, Heli
Törmältä käsin
[Karesuando: Annes tryck o souvenir, 2006]
ISBN 91-631-8065-0
178 sivua

Heli Kipinän kirja tapahtuu Pajalan seuvula viiskymmentä- ja kuuskymmentä luvula. Se sisältää liikuttavia mietiskelyjä ja novelliä menheestä aijasta. Monessa kertomuksessa tullee esile kunka tähelinen ja monesti elintärkeä lähimäisitten välinen rakhaus oon. Pohjahenki oon kristilinen. ”Törmältä käsin” sisältää vakavuutta, syvvyyttä ja samala kansa paljon huumoria. Se oon helppoluettava koska kirjailia konsekventisti käyttää puhekieltä juoksevassa tekstissä jossako oon paljon ruottalaisia sanoja jokka oon suomenettu. Tavalinen tapa Tornionlaaksossa. Tämä helpottaa lukemista sille joka ei ole harjaintunnu lukheen meänkielelä.

Kostenius, Bengt
Kuolema karhuunpesässä! Kertomus Meänmaasta
Barents Publisher, 2008
ISBN 978-91-89144-45-3
146 sivua

Pohjanen, Bengt
Murhaballaadi. Dekkari
Barents Publisher, 2008
ISBN 978-91-89144-46-0
60 sivua

Tuomas Larsson, Kerstin
Elämän aalot
Riitaukset: Linnéa Lepistö
Kaamos, [2006]
ISBN:91-87410-29-X
48 s. : ill.

Se oon reisu aijassa ja paikassa jonka Kerstin Tuomas Larsson tuopii esile tässä hänen toisessa runokokoelmassa meänkielelä. ”Minun polula kukat oon jo koottu”, se kirjottaa. Tunne ulkopuolisenna, ette häätyä olla herheilä ja ette häätyä vaarottaa ommaa kieltä oon takashiintulevia teemoja. Sielä oon surua, syytä ja häpyä siittä ette Tornionlaakson lapset ei saahneet maholisuutta meänkiehleen sillä ette ko sitä oppi ruottin niin sitä ei puhunu meänkieltä ei ees vahingossa ja sitten se oli liian hiljasta. Siinä oon vaphaus rohkheuessa ette tohtia irtaintua, piiain sammuttaa elämänjanon ja rauhalisesti soutaa toisele puolele jossako monet tutut kasuvet kattovat sinua. Lapsuuen traumoissa virtaa kansa vähän valoa sisäle oven raaosta porstoassa koska sanattomuuelaki oon tuntheet. Syvähenkinen runokokoelma.

Tuomas Larsson
Ääni kirkonmaan juurelta
Kaamos Förlaaki, 2002
ISBN 91-87410-27-3
52 sivua

"Runot oon suorat ja kieli oon fiini. Oon oikein hauska lukea meänkieltä ko kieli juoksee niin helposti ko tässä kirjassa. Kirjailia antaaki lukialle maholisuuen omassa ittessä tulkita sisälön, riippuen omista kokemuksista. Ja torniolaaksolainen tuntee ittensä runoissa. Kirhjaan mahtuu arkielämää, surua ja huumoria. Luonto oon elävä, väylä yhtä eloa antava ko kirkonmaa omila kertomuksila levosta, rauhalisuuesta ja lohutuksesta. Kokoelman titteliruno herättää ajatuksia elämän eri vaihheista jossa oon surua, taistelua, pölköä ja sen vastakohtaa elämän halua ja luottamusta."
( Marita Mattsson Barsk, MET-aviisi nr 3/2002, s. 8 )

Tillberg, Eric
Muistoja kotikylästä ja muualtaki. [Meänkielentänny ja tarkastannu tekstin: Kerstin Johansson ja Matti Kenttä]
Kaamos, [2004]
ISBN 91-87410-28-1
113 sivua

Eric Tillberg kertoo kirjassani elämästä lapsuuen ja nuoruuen vuosilta Ruotkomaan ja Långhedenin torpissa Kainulasjärven lähelä ja omalta elämän reitiltä mettästä Työsuojeluhallitukseen/Yrkesinspektionhiin.
Koulunkäynti Korpilompolossa ’puurotuan kläppinä’ ei ole jääny hauskaan muisthoon, liian usein lapset sait tuntea ittensä huonomiksi ihmisiksi.
Koulunkäynti loppu ja Erkillä ei ollu intoa jatkaa koulutusta. Työnhaku oli tärkeä. Erkistä tuli puojiapulainen ja sitten hän oli monta vuotta mettätöissä ja kultuksissa.
Mutta Erkki päätti lähteä muualle: Malmikenttien kansanopistoon Hallantin Åshaan. Eric Tillberg kertoo koulutustiestänsä pojies raskhaasta mettähommasta työsuojeluhallituksen ammattiin. Tie ei koskhaan ollu suora mutta joka kurssi antoi uutta ja tärkeätä tietoa ja hänellä oli into mennä eespäin.
Eric Tillberg on antanut meille hyvän kuvan 1940-luvulta torpparien, uittomiesten ja mettätyöläisten elämästä ja varsinki yhen nuoren miehen innokaasta koulutustiestä.

[Kalevala]
”Jokos lorut lapoit lophuun”. Neljä laulua Kalevalasta meänkielelä.
Meänkielentänny: Bengt Pohjanen
Kuat: Jörgen Hammar
Barents Publisher, 2007
ISBN 978-91-89144-39-2
117 sivua